وكالة أنباء الادب العربى
مرحبا بكم فى وكالة انباء الادب العربى

موسوعة شعراء العاميه المصريه / شاديه الملاح

استعرض الموضوع السابق استعرض الموضوع التالي اذهب الى الأسفل

موسوعة شعراء العاميه المصريه / شاديه الملاح

مُساهمة  وكالة انباء الادب العربى في الجمعة فبراير 12, 2016 4:45 pm




نشاز
الوتر
اللى بيعزف حزنك
جوه الشرايين
الماسكه زمام الضحكه التايهه
ف شجن الروح
تقاسيم النغمه
ف كونشيرتو دموعك
بيفسر
كل آهات القلب النازف
تواشيحك
ويبعتر
كل النغمات المشروخه
فى روحك
صحف الأخبار
المليانه كآبه
بتوزع كل الأتهامات
على نوتة الأحزان المعروفه
بوتر النوح
وتحقق فى قضايا
الأااااااااااااااااااه المخنوقه
وازاى
الأحباب اللى اديتهم عمرك
على تابوهات الحلم الوردى
عزفوا نهاية المقطوعه
نشاز
----------------------------------------------------



لحظة صبر
دموع حزنك على خدودك
وترسم ضحكه ماليه الكون
فى ننى عينيك
وموالك
سنابل قمحها الأخضر
ومتغمس
بدمعة قلبها المكسور
أنا ضليت بأوجاعى
فلملمنى فى عيون الناس
منيش طماع ولا جاحد
أنا شجنك
وبسمة حزن بتمطر
بدمعة قلبها المكسور
وافتح عينى ع الدنيا
واشوف الموت ينادينا
ساعة ما الشمس بتروح
فيملا اليتم أحلامى
يالحظة صبر جوانا
بتتحايل
على موج الأمل يجرى
ياخدنا بعيد
نكون الكون بأبعاده
وريد واصل
مابين القلب والننى
وصوت الساقيه فى غيطانك
أذان الفجر فى الجامع
يثير شجنى
وانا العارف
بأن الطيبه فى عروقك
فاماتلومنيش
وايه يعنى
على رقاب الخلايق موت
يبعتر كل مافينا
ويرسم فوق جدار قلبك
ولد حاير
بيغرس فيكى أحلامه
لكنك بور


--------------------------------



حلم الولد

لملمت قلبى
اللى مبدور على سكة لقا الأحباب
وبقيت أخاف
صوت الغناوى والشجن
لما الوجع
يعزف على اوتار الألم
نفس الغناوى
والخريف لما الورق لاخضر
يموت فوق الشجر
مليون دليل
يفتح بيبان الوهم ولآخرمداه
نفس الحروف المكسورين
ساعة لقاك
حتى العتاب
عمال بيطرح للظنون
نفس السؤال
مين اللى خللى بين قلوب العاشقين مليون جدار؟
لما الفراق
يفرد شراع المستحيل
والدمعه فى عيون القمر
شنطة سفر
للعاشقين والمغرمين
ماهو محتمل
يرجع ومن تانى الغريب
أوعاك تتوه
أوتدى سرك للرياح
فتبعترك
مصلوب ويا حلم الولد
راحل بعيد
متبعتره فيك الحياه
كل البراح والمبتدا
ماعاد يلم اللى انفرط
على عتبة الفجرالبعيد
لساك بتغزل للأمل
عقد الليالى م الشجن
ولافيه ندى
آاااااااه يا زمن
فاتح شبابيك الجراح
وبترخى حبلك ع الفضا
زى اليتيم
ملهوش وطن
مكتوب عليك تفضل امام
والمفترض.
هاتموت هنا
ورموش حبيبتك
بين حنايا الأورده
بتعزى فى قلوب البشر
لما الطريق يصبح بعيد
وقت الخريف
كفن همومك جوه قلبك من سكات
خلصت خلاص
ماتت بذور الأمنيات
وقت المخاض


-----------------------------


سيره ذاتيه
الاسم \شاديه محمود مصطفى الملاح
الشهره \شاديه الملاح
الصفه \شاعرة عاميه .وعضو عامل بأتحاد كتاب مصر
عدد الاصدارات \3 دواوين شعريه
اسماء الاصدارات \ ديوان شاطىْ الأشواق عن مطبعة دار الاسلام
_ديوان همس القلب .عن مطبعة دار الاسلام
_ ديوان عيدان من غير ورق ,الهيئه العامة لقصور الثقافه
شاعرة عاميه وعضو عامل فى اتحاد كتاب مصر
عضو مجلس ادارة نادى أدب الاسماعيليه.مثلت مصر فى مهرجان الربيع بتونس للاحتفالات بالثوره التونسيه2013
حصلت على درع جامعة قناة السويس فى احتفالات 6 اكتوبر 2009
تم ترشيحى كشخصيه عامة بالمؤتمر العام لأدباء مصر المنعقد بمدينة أسوان 2016
تم انتخابى كعضو امانه للمؤتمر العام لأدباء مصر فى دورته الثلاثون بمحافظة اسوان


_________________
اعداد
محمد عبد القوى حسن

maa66aa66@hotmail.com
avatar
وكالة انباء الادب العربى
المدير العام للمنتدى
المدير العام للمنتدى

عدد المساهمات : 264
تاريخ التسجيل : 30/04/2010
الموقع : www.maa66.malware-site.www

http://www.maa66.malware-site.www

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى