وكالة أنباء الادب العربى
مرحبا بكم فى وكالة انباء الادب العربى

موسوعة شعراء العاميه المصريه /محمد عطوه

استعرض الموضوع السابق استعرض الموضوع التالي اذهب الى الأسفل

موسوعة شعراء العاميه المصريه /محمد عطوه

مُساهمة  وكالة انباء الادب العربى في السبت فبراير 13, 2016 11:16 am



كل عام..
و الظروفْ غير الظروفْ


كُلْ عام و انتوا بْسعادهَ وْ طيبين
بسْ شيلوا لقلبي حَبَّه
أصلُهُ موجوع حبتين
فاتهُ خِلُّه من يومين
قال مِسافرْ ثُمّ راجعْ
عدَّى قَطرْ و بعدهُ قطرْ
و المحطَّه لسه نورها ليه ماجاش؟
كُلْ عام و انتوا حبايبْ
ماتقولوش كِبير و عايبْ
لِسَّه قلبهُ يدُقْ فَجْأه
ترتِعشْ جُوَّاه ضلوعهُ
قلبي خايب صدَّقوني
أيْوه بيحب بْصراحه
نِجم فوق الشمس عالي
و النجوم يا اولاد بلدنا مُشْ حَلالي !!!
كل عام تِسْعِدْ قلوبكم طيْباتُه
و الغيطان الخضرا تِكبَرْ
و البيوت بالخير تِكَبَّرْ
بس لقمة للّي عايش يوم بطولُهُ
لَجْلْ لُقْمَه
مِشْ حَـسَد و الله ليكوا
و لَّا حتّى بالوم عليكوا
انَّما العَدل وْ ميزانهُ
و الفقير يلْقَى فْ مكانهُ
بطانيه و بالطو صوف.
كل عام..
و الظروفْ غير الظروفْ
و اللّي شايف
و اللّي مِشْ عايز يشوفْ
يبقى شايفْ.
حلاوة المولد ....
على الحلوين بتتْقسِّمْ
حلاوه وْ وردْ
فى عز الشوق لساعة نوم فى حضن دفَاكْ
و لسعة برد سحلاني على جبينَكْ
و طعم الفول مخاصم معدتي جداً
غُلبت اقول و حشتوني
عروسه و مشط بالحُمُّصْ
حصان لا يْزوم و لا يُرفسْ
و انا نازل لجُبْ الخوف
من امبارح
و مش ناوي ابصْ لْنجمهَ عشقاني
لانّي بجد حقَّاني
و جيبي فقير
فقير جداً و عايش يومُهُ بالفَكَّه
و يوم من غير تتأثَّرْ بأحوالي
تخاصم ايدي باب جيبي
و يتخانقوا على المشاريبْ.



حلاوه لمين ؟
يا هلْفوت الشوارع نام
على لسانك سؤال بايخ
لفين رايح ؟
و مين قالكْ تقرَّب جنب شِبَّاكْنا
مفيش فى الصوره غير الشيشْ
و ع المكتبْ ورق مناديلْ
و كام توقيع على الأبيض
و ساعه تدق ما تُدُلَّش على المواعيد
محدش قال لاحلامَكْ بأن الصفحه دي خِلْصِتْ؟
و خطوة رجْلَكْ السَّافره على السِلّم
ناقصها الملح؟.
و كاتب شِعر بتقاوح
بحرف فقير فضاءْ جامحْ؟
عليك اللعنهَ يا كافر بعُزَّى وْ لاتْ
ما تفهم وضع سِكتنا بماضي و أتْ
و لِمْ اللّحن ع الغنوه بلح أمهات
تِّشَرَّق يابني او تِغْرُب
سمانا بعيدْ
فَ خُدْ مولد لأولادك
حلاوه فْ عيد و حدوته
عروسه فْ ايدْ
بتْتقسِّمْ على الحاضرين.




صاحِب ملاك الموت
الموت نبيلْ
بيحب بس يْلِمنا مع بعض
ممكن نعيش بس فْ تابوت
ممكن نموت بس فْ براح ملهوش حدود
تفارقني يمكن او افارقك باعتذاري عن حضوري ف دفترك
لكن نموت على قد موتنا فْ بعضنا.
موت الجسد خطوه ف حياة الروح
فما تبكينيش اذا مت
قرَّب على الشاهد و سامح رغبتي في الإنتقال
و قابلني وقت ما يشتهيك الموت
علشان نكمل حبنا بالحب.
تقدر تشيل كفني فْ كتاب
او تستميح القبر في الفسَحَه على الجنب اليمين
خمسين سنه متنتورين ع الارض
ما بين عطش الضلوع للوجد و بين ملامح سكتي التايههْ.
الباقي كام من عمر أحلامنا؟
يمكن يومين أو ساعه أو لحظه
لو تشتري الأيام ما تبيعش انسانك
صاحِب ملاك الموت و اشتري نعشك.




سيرة ذاتية
محمد عطوه علي ابراهيم
شاعر و قاص و عضو اتحاد كتاب
المؤهلات العلمية:
- ليسانس الأداب قسم اللغة الانجليزية "دراما و شكسبير" 1985 – كلية الآداب جامعة المنصورة.
- دبلوم الدراسات العليا في علم النفس 1990
- ماجستير في علم النفس التحليلي التفاعلي من الجامعة الأمريكية للدراسات الاحترافية
- دبلوم ادارة اعمال معهد الألسن دولة الامارات العربية المتحدة
رئاسة تحرير وتأسيس مجلات أدبية:
- مجلة صوت ظفر
- مجلة الشعلة دولة الامارات العربية المتحدة
- جريدة الشاهد المصري
- رئيس مجلس إدارة موقع الشاهد المصري
- من مؤلفاته ودراساته باللغة العربية :
- وشم السكوت مجموعة قصصية 1999النص الفائز بجائزة الابداع عن دائرة الثقافة و الاعلام بالشارقة
- فولدر وهمي. ديوان شعر بالعامية المصرية 2015. دار الاسلام للطباعة و النشر سلسلة النهار الأدبية.
- لعيني خديجة ديوان. شعر بالفصحى (تحت الطبع)
- صلاة في محراب الوجع. شعر بالعامية المصرية (تحت الطبع)
- دراسات و رؤى عن مجموعة شعرية و قصصية لشعراء مصريين و اماراتيين.







_________________
اعداد
محمد عبد القوى حسن

maa66aa66@hotmail.com
avatar
وكالة انباء الادب العربى
المدير العام للمنتدى
المدير العام للمنتدى

عدد المساهمات : 264
تاريخ التسجيل : 30/04/2010
الموقع : www.maa66.malware-site.www

http://www.maa66.malware-site.www

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى