وكالة أنباء الادب العربى
مرحبا بكم فى وكالة انباء الادب العربى

موسوعة شعراء العاميه المصريه /منصور عبد المقصود

استعرض الموضوع السابق استعرض الموضوع التالي اذهب الى الأسفل

موسوعة شعراء العاميه المصريه /منصور عبد المقصود

مُساهمة  وكالة انباء الادب العربى في الجمعة فبراير 26, 2016 4:20 am










أنثى

ولإنها مخلوقه من ضلع الوجع
ولإنها عاشقه الجدع
وهبت حياتها لخدمته
كانت إبتسامه
فى عز لحظات الألم
كانت دفا
غزلت من الرمش الوفا
غرقت حياتهم فى العسل
إلى منتهاه
الحلم صعب .... لكنها
قادره تملى تبسطه
كانت له
مصدر قوته
ولإنه كان عتره وجدع
كان ليها فارس
الدمعه لو زارت خدودها
يضمها ضمت حنان
القلب لو يوم إشتكى
يبقى الأمان
لمسة إيديه
كانت عنيه
وكانت إبتسامة دنيته
رفض الزمان غير
إنه يلعب لعبته
مات الجدع
سايب عياله فى حضنها
ولإنها
أنثى تساوى 100 جدع
ولإنها
شبعانه من صدر أمها
ولا ألف حد يهمها
حلفت تحقق حلمهم
صبحت أبوهم وأمهم
عبرت
تضاريس الحياه على مرها
يا مؤمنه
يا ملهمه
يا معلمانا الوقفه فى وش الزمن
رفض الزمان إنه عليهم يؤتمن
عمرك
وجهدك
دمك
وطهرك
كان تمن
مقدرش أبدا يدفعه
أعتى الرجال
يا هادمه من ضلع الوجع
كل المحال
يامبدعه
فى صنع الرجال
مين بس يقدر يشكرك
فى زمن الرداءة والبدع
ولإنها
مخلوقه من ضلع الوجع
فمكنش شيئ بيهمها
غير إنها
أنثى تساوى 100 جدع

----------------------------------


شمسك

وشمسك لسه هربانه
بتدارى
فى ضى عنيكى
مش قادره
تواجه زيف
مشاعر
تحرق البسمه
على خدك
تسيل أوجاع
تصب مرار
فى حلق النهر
تنادى ع السما الصافيه
هواكى
لما أصبح طيف
بيسبح
فى حدود ضيك
فيغرق
فى دموع القهر
ونهر كبير
مهوش قادر
يكون مرسا لأحلامك
على بابك
سنين العمر مخنوقه
بزور مبدوره على أرضك
ف عرضك
داوى أحشائك
من البزره
اللى معطوبه
ف طوبى
للى يوم صانك
وطوبه
فى وش مين خانك
يا مانحه الكل إحسانك
وجامعه
من البشر حسنات
نهارك
مهما طال غيمه
يزقزق ب الادان عصفور
لكن عمره ف ليلة ما مات


-----------------------------



بحبك
..........
امانه يا فارده للاغراب
دراعاتك
وحضناهم ونايمين ع
الكتاف منك
هنا ابنك
بيتألم ماليه الحزن
وليدك بس نفسه حضن
يا خايفه للكلام يكتر
ده حتة حضن مش اكتر
يداوى كل أحزانه
يا جارحه قلبنا الغاوى
يغنيلك
غنانا الليله بات مشروخ
ومتخبى فى صوت الهم
يعيش العمر لا يهمه
رغيف العيش ولا اللقمه
وحالف انها البسمه
على جبين الوطن دى اهم
فدارى الدمعه من عينك
يا حبى الغالى عاوزينك
وقابلينك
ومش هنقول على عيبك
على عيبنا
يا اجمل ما الهوى النادى
صباحك والله مش عادى
صباح عينك
صباح دينك
صباح تاريخ
مزين كل ميادينك
يا حته من السما الصافيه
بكينا والدموع طلقه
بنرميها فى وش الغم
ونتبسم فى عز الهم
نتفرق
ونتخانق
ونتجمع
مع اول دموع ليكى
عشان نمسحها بالمنديل
نشوف وشك كما القنديل
منور جوه قلب الطفل
فيحبك
ويكتب لك
حروف اسمك
بلون الدم

-----------------------------



منصور احمد محمد عبد المقصود
عضو نادى الادب بثقافة الاسماعيلية
عضو مجلس ادارة نادى ادب الاسماعيلية الفترة 2015 و 2016
محاضر مركزى بقصورالثقافة
لى ثلاثة دواوين
يا طيبة ... عامية
أميرة ...... عامية
العصفور الازرق ..... فصحى
وله تحت الطبع ديوان ( انثى تساوى 100 جدع )

_________________
اعداد
محمد عبد القوى حسن

maa66aa66@hotmail.com
avatar
وكالة انباء الادب العربى
المدير العام للمنتدى
المدير العام للمنتدى

عدد المساهمات : 264
تاريخ التسجيل : 30/04/2010
الموقع : www.maa66.malware-site.www

http://www.maa66.malware-site.www

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى