وكالة أنباء الادب العربى
مرحبا بكم فى وكالة انباء الادب العربى

موسوعة شعراء العاميه المصريه / احمد هيكل

استعرض الموضوع السابق استعرض الموضوع التالي اذهب الى الأسفل

موسوعة شعراء العاميه المصريه / احمد هيكل

مُساهمة  وكالة انباء الادب العربى في الأربعاء مارس 09, 2016 1:04 pm


بواقى مواسم


           ( واحد )
مطرود من رحمة الموت
والزحمة.. والاسفلت
ماسك بين صباعينك
ورقه  واحدة
من نتيجة ماتت
من خمستاشر سنة
السنين ممكن ترجع لورا ؟
ـ ايوه ..
ـ بس انت اللى ما بتعرفش ف الحساب
مطرود من رحمة الشياطين
ـ كان لازم جلدك يبقى خشن شوية
ـ وضوافرك تطول حبتين
ـ وصوتك تطرد منه طعم اليانسون والنعناع
**********

(اتنين)
قلب ما بيحبش ضرب الرمل
وبيتَكّى على الحكاوى
فتخرج مشربيات.. وبخور.. وخلاخيل
وقُلل مستنية رحمة المطرة الكسلانة
قلب بينزل المزاد
وما يلاقيش إلا جرس يصرخ
ألا ..... ترى
*************


(تلاته)
أنا ....
العصافير
اللي بلََّل ريشها المطر
فاتهزت جواها الحكاوى
أنا ....
الغربال
اللى طالع من الصَدَفْ
وبيغافل التحويطة المربكة
أنا ....
موش الصرخة اللى هزت المواويل
ولا عتمة الجدران العمية
اللى بتولد الخوف .. والجوع
.....................
......................
......................
.................
.. المطرة ... الخوف ... والجوع
الاكلشيهات اللى حاوطت روحك
من الست أركان
وبتدَوّر على حبة هوا
          ترمى فيها
بياضك .


احمد هيكل ادم



كلاكيت
الزووم موش قادر يفتح
وخطوط الطباشير ع الأرض
عماله تشاور لبعضها
... كانت عماله تحوم حوالين دماغه
وموش قادر يقفشها
البروجكتورات
كانت عماله تلمس ع الفاضى
حَسّس على جيبه
سحب علبة السجاير
..........
أول امبارح بدأت تحوم حواليه
فضل يلف ويدور
وهى تلف وتدور حواليه
أول ما بان كعب رجلها
اعصابه كلها اتفكت
فضل يتحايل على الزاوية
علشان تفتح شوية
الزووم كان قافش ع الآخر
... البروجكتورات عماله تلمس ع الفاضى
بصت بعنيها وهى بتضحك
نام على بطنه شويه
.. وعلى ضهره شويتين
رفع رجليه مره ...
نام فى وضع جنينى مره تانيه
.. شعرها بدأ يتسلل من سقف الأوضه
فكر إنه يمسكه..
اتراجع فى آخر لحظة  
باعتبار إن ده موش تصرف جنتلمان
بعد كل حيَله ما خلصت مع آخر سيجارة
لقاها واقفة بشحمها .... ولحمها
طفى كل البرجكتورات وصرخ...
... كلاكيت .
احمد هيكل ادم

رباعيات

لو حكموا الدون ما يدل
والحكم ابدا ما صايب
الحمق ع الجهل بيدل
ويجيب جميع المصايب
*****
كسرة حبيبك تداوى
وحمام عدوك بلا
اصل الكلام المساوى
بينز ديما حلا
****
قطع العشم ما هو هين
واللى بيوصل مواصل
والقول لو كان لين
يعدل مقال المفاصل
****
كتر الملام لم يلايم
اللى ف قلبه قناعه
العقل موش بالعمايم
والشكوى اوحش بضاعه
****
الخالى يحكى براحته
ويساوى كل الحكاوى
واللى النيران تكوى راحته
دلت عليه البلاوى
****
الحيه ايه يكون نتاجها
لوجوزوها نبي
لو ملكوها بتاجها
برضه تخلف غبي
****
لو كل حر اتنصف
ما كانتش بارت بضاعه
ابليس يبيع الشرف
ويصلى بينا جماعه
****
احمد هيكل ادم



سيرة ذاتيه
الاسم : احمد هيكل آدم احمد
تاريخ الميلاد : 26/7/1965
المهنة : مدير حسابات بوزارة المالية
رقم عضوية اتحاد الكتاب : 2849
اعمال منشورة
1- محتفيا بالصمت             شعر فصحي          الهيئة العامة لقصور الثقافة
2- من حكاوى العتمة           شعر عامية           دار شروق
3- صور عجوزة               شعرعامية            الهيئة العامة لقصور الثقافة
اعمال تحت الطبع
1- صندق فارغ            شعر عامية
2- جوار الرحمة بقليل    شعر فصحي
3- ثلاث مسرحيات       مسرحيات
إعداد وتأليف اشعار لمسرحيات بالهيئة العامة لقصور الثقافة وبعض الفرق الاخري منها :
علي الزيبق - الواقع صورة طبق الاصل - منين نجيب ناس - عنائم الملاعين- الزفة
اغاني واشعارلمسرحيات بالهيئة العامة لقصور الثقافة منها
محاكمة جحا- العدو في غرف النوم- عابر سبيل- الابرياء- بيكيا- نقول ايه- محطة مصر- التميمة والجسد- الزفة- الفاس في الراس

_________________
اعداد
محمد عبد القوى حسن

maa66aa66@hotmail.com
avatar
وكالة انباء الادب العربى
المدير العام للمنتدى
المدير العام للمنتدى

عدد المساهمات : 264
تاريخ التسجيل : 30/04/2010
الموقع : www.maa66.malware-site.www

http://www.maa66.malware-site.www

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى