وكالة أنباء الادب العربى
مرحبا بكم فى وكالة انباء الادب العربى

موسوعة شعراء العاميه المصريه / دسوقى الخطارى

استعرض الموضوع السابق استعرض الموضوع التالي اذهب الى الأسفل

موسوعة شعراء العاميه المصريه / دسوقى الخطارى

مُساهمة  وكالة انباء الادب العربى في الجمعة يناير 29, 2016 1:45 pm




[url=]
دسوقى الخطارى[/url]فى حضن الليل
-------
آخذك جنبي في حضن الليل
نحكى الحواديت المنسية
على ضى النجمة النايمة هنااااك
على بُعد يادوووب خمسين آهة
من جوة القلب الباكى عليك
من ظلم زمانها وجرح هواك
على بُعد يادوب مية "100 " تنهيدة
تمللى تشعلل فكرنا فيك
وساعات بتشحتف قلبي عليك
ساعات ترميني ف بحر غويط
موجة تجيب ،، موجة تودى
رغم الموج برضه باعدى
وأعرف إني في بحر عينيك

-------------------------------------------

أغراب يا ليل
-----------
أغراب ياليل عن أهلنا
مصت دمانا الأرصفة
والغربة في ليالي الشتا
رعد وبرق وأفأفة
كل الشوارع جليد
مفيش حيطان بتلمنا
ولا صدر دافى يضمنا
ولا دمنا حس بدفا
أغراب ياليل عن أهلنا
ف عذاب وويل
عايشين هنا
لو شفتوا أحوال الغريب
تلاقوه بيكره غربته
ف منامه يحلم بالرجوع
ومناه يكون بين عزوته
مش هامه يبرد أو يجوع
حالم بسهرة ف ليل الصيف
بنسمة فجر وقمرة ليل
وضحك مخلوط بالدموع
حزين على الأمل اللي ضاع
على فرحة أو لحظة هنا
أغراب ياليل عن أهلنا
ونفسي أقول بعلوّ حسي
يا أرضنا ملعون أبوكى
ملعون أبوكى ياللى شيلتى
فوق كتافك همهم
وقرنتى باسمك اسمهم
نفسي أقول ملعون أبويا
اللي قال لي الأرض أرضك
حبها وحافظ عليها
شيل ترابها جوة قلبك
دوس على اللي يدوس عليها
حبة حبة لقيتنى بأكبر
وأكره الظالم لناسى
اطاطى راسى وابوس ايديكى
أمشى في الأيام وأعافر
قلت أسافر لأجل اجيكى
حبة حبة لقيتنى باسقط
من نظرهم فوق ترابك
حبة حبة لقيتنى باغرق
مع غربتي ف بحور عذابك
قدموني دليل براءة
صك عفو عن اللي كانوا
طول حياتهم ينهبوكى
سرطنوا الدم ف عروقك
كان هدفهم يهدموكى
توهوكى ، شردوكى
لفوا بيكى ولففوكى
فوق بحور بالدم تجرى
سامحتى وغفرتى الإساءة
لما آدم أغرى نفسه
لما إبليس خد براءة
بعد طول ايمانى بيكى
كفرت بيكى ، دعيت عليكى
ملعون أبوكى يا غربتى
يا غربتى ملعون أبوكى








--------------------------------
أنا مش شهيد
----------
أنا مش شهيد
أنا مش مصاب
أنا سطر واحد في الكتاب
أنا أسمى مصري ومصر أمي
مصر روحي ونور عنيا
كل حرف شاهد عليا
إن أنا بس الفدائي
من بدايتي لانتهائي
من ميلادي ليوم مماتي
للنضال واهب حياتي
والجهاد واجب عليا
بأمر ربى في الكتاب
الحسنايين هما الجهاد
إما نصري أو شهادة
فرض مكتوب ع العباد
صابعى ده يبقرا الشهادة
ونفسه يضغط ع الزناد
عسكره كانوا يضربوني
كنت باصرخ من جنونى
سلاحى كان هو العناد
الله اكبر ع الرشاوى
الله أكبر ع الفساد

--------------------

باستعين بالله وباطلب رحمته
بحق جاه المصطفى ومحبته
يرحمنى من كيد البشر
من شر حد محبنيش
وشر ساحر إن سحر
يرحمنى من حقد النفوس
وعين حسود فلقت حجر
وناس أنا مابحبهاش
للشر قاعدة بتنتظر
من شر أتباع الشيطان
وحزب إبليس اللعين
يارب يا نعم المعين
عفوك يارب ورحمتك
من دمع متحجر في العين
من جسم مش طايق الوجع
وحلق ناسف م الأنين
يارب أنا ليك بابتهل
وبادعى من قلبي الحزين
تعبان وباتمنى الشفا
أنا بعد منك ليا مين
يا احبابى يا للي باحبكم
ادعوا معايا وقولوا آمين

-------------------------
حلمي اللي كان
------------
بين المزارع والغيطان
حلمي اللي كان
مليان دفا
فجأة اختفى
وكتب لي بشوية عيدان
عبارات حنان
على أرض عذبها الأنين
فرقة وحنين مع دمعتين
سايلين على الأرض الفضا
لما انقضت
أيام حبلها بالحصاد
والخير على كناف السنابل
قمح سايل
قال خلاص أزف الرحيل
ف نهار وليل
جفت عيدان القمح وفروع البصل
وكلام حصل
لا كان خناق ولا كان زعل
بين الجداول والدرابيس
خلى المشاعر والأحاسيس
بين الأحبة تصير مثل
بين الشوارع والحيطان
حلمي اللي كان
برد وأسى فجأة اكتسى
وخط على جدران البيت
حبة حواديت
ودموع مراوغة ومحلسة
وقال خلاص حل الشتات
طفينا نار الدفايات
لملمنا أحلا الذكريات
بين الفواق والنعنسة
ما بين حنين ودموع عنين
سايلن على الأرض الفضا
لما انقضى
زمن المحبة والاشتياق
للمة وحكاوي الشتا
في كلام كتير لا مرة كان
ولا يوم حصل
لا كان خناق ولا كان زعل
بين الحبايب والصحاب
خلى العتاب
بين الأحبة يصير مثل


------------------------------------


سيرة ذاتية
--------------

* دسوقي عبد الموجود سليمان محمد
( دسوقي الخطارى )
* مواليد 3 ديسمبر 1964
الخطارة – نقادة – قنا
* يعمل أمين مكتبة بالتربية والتعليم -
إدارة نقادة التعليمية - مديرية قنا للتربية والتعليم
* عضو اتحاد الكتاب تحت رقم 2758
* عضو مجلس إدارة فرع الأقصر لاتحاد كتاب مصر
* يشغل منصب " أمين صندوق " فرع الأقصر
* عضو نادي الأدب المركزي لفرع ثقافة قنا
* رئيس نادي أدب نقادة
* عضو النقابة العمة للصحافة والإعلام
* نشرت له عدة قصائد ومقالات أدبية بالصحف والمجلات
* يشارك بجدية في فعاليات الحركة الثقافية بحضوره المهرجانات والمؤتمرات
والندوات الثقافية والأمسيات الشعرية
* صدر له
- ربما لا نلتقي ( ديوان شعر بالفصحى )
- حبيبتي والليل ( ديوان شعر بالفصحى )
- صفير البلابل ج 1 ( دراسة في الأدب الشعبي )
- صفير البلابل ج 2 ( دراسة في الأدب الشعبي )
- دموع الأمل ( ديوان شعر بالعامية )
- أقر .. وأعترف ( ديوان شعر بالعامية )
- تخاريف ( ديوان شعر بالعامية
* له تحت الطبع
- صفير لبلابل ج 3 ( دراسة في المعتقدات الشعبية )
- صفير لبلابل ج4 ( دراسة في العادات والتقاليد الشعبية )
- النوبيون من ..هم ( دراسة في العادات والتقاليد النوبية )
- من سجل الذكريات ( ديوان شعر بالعامية )
- مأثورات ليست أمثالا ( دراسة فى الأدب الشعبى )
- على وتر الرباب ( رباعيات )
- بيت النصارى ( رواية )
---------------------- للمراسلات والتواصل ------------------------------
العنوان .. قنا - نقــادة – الخطارة e =mile…. Aladib2020@yahoo.com
هاتف ..01012306080 .......... 01111717298



_________________
اعداد
محمد عبد القوى حسن

maa66aa66@hotmail.com
avatar
وكالة انباء الادب العربى
المدير العام للمنتدى
المدير العام للمنتدى

عدد المساهمات : 264
تاريخ التسجيل : 30/04/2010
الموقع : www.maa66.malware-site.www

http://www.maa66.malware-site.www

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى