اعذرينى يا بلدى

اعذرينى يا بلدى
وعارف ان عذرى
على ذنب كلامى
اقبح واكبر
مهو لازم نشوف
حال غيرنا
وعلى حالنا نتحسر
اعذرينى مش حسكت
رغم خجلانى منك وكسوفى
اعمل ايه
مهو كل خطوة
يزيد عليكى خوفى
اعذرينى لما اقولك
باقى عليكى كتير
خدعوكى وقالولك
اللى حصل ده تغيير
اعذرينى لما اقولك
شوفى حواليكى كام عروسة
وقد ايه اصبحتى عجوزة
وحقك تكون اجمل عروسة
شوفى ازاى خدو الوانك
وحل علينا احنا ظلامك
اعذرينى لما اقولك
ولا اقولك انا عارف
انا عارف انه مش ذنبك
وان جرحنا هو جرحك
بس مين كان وقف فى صفك
عشان عايزانى
انا اقف جنبك
اعذرينى لما اقولك
عايزانى ازاى اساندك
وانا كل اما اقول
شايف امل فيكى
فى قسوتك عليا بتزيدى
ليه دايما كسرة فرحتى
كسرة قلبى وقوتى
اعذرينى لما اقولك
كام مليون مرة وقفتينا
وعن احلامنا اخرتينا
وتشوفينا تضحكى
طلعتى عين اهالينا
وعلى اليأس عودتينا
ومتقوليش بكرة احلى بينا
اذا كنتى بخيرك
مش بتمدينا
وترابك سففتينا
معادتش حد فيكى قادر
على رجليه يقف
ولا حتى قادر يزحف
اعذرينى
مهو واجب عليكى
مش باختيارك انك تعذرينى
واما اعاتبك لازم تسمعينى
اعذرينى لما صفحتك جوايا
تملاها كلمات عذاب
انا حر
وانتى مش على هوايا
خلتينى اخبط على كل باب
اعذرينى
يا ام الدنيا خلاص
صغرتى فى عيونا
واعذرينى
لو فى يوم سيبتك
ومتكدبيش وتقولى
لولادى بعدى انى هجرتك
اعذرينى
انتى مخلتيش فرصة
عشان اقدر احبك
بهتانة جوايا صورتك
عارف ان كلامى وجعك
مهو مين غيرى عايش فيكى
ومين غيرى حس بيكى
ومين غيرى كان سمعك
يبقى لازم تسمعينى وتعذرينى
يابلدى اعذرينى

جميله ياشاعر تمنياتى لك بالتوفيق

نص جميل
ونظم جيد للكلمات
دمت بحفظ الرحمن[center]