وكالة أنباء الادب العربى
مرحبا بكم فى وكالة انباء الادب العربى

موسوعة شعراء العاميه المصريه / زينات القليوبى

استعرض الموضوع السابق استعرض الموضوع التالي اذهب الى الأسفل

موسوعة شعراء العاميه المصريه / زينات القليوبى

مُساهمة  وكالة انباء الادب العربى في السبت يناير 30, 2016 10:22 am

[url=]
زينات القليوبى[/url]


قصيدة دار المسنين
لشاعرة الشعب
زينب القليوبي
بتلم ليه الهدمتين والطرحتين والشبشبين ؟

ماتقوللي يا ابني واخدني فين؟؟؟

علي بيت جديد؟!! .. ما أنا ليه بيت

هو أنا يا ابني اشتكيت؟

مش عايزه يا ابني بيت جديد…

البيت دهه أنا عشت فيه خمسين سنــــــــه

ما اعرفش غيـــره أي بيت ؟؟؟

أنا جيت عروسه صغيرة

وقعدت فيه لمّا أتحنيت

مين اللي قال أنا عاوزة بيت

أسأل بلاط الأرض ؟؟؟.. وأسأل كـــل حيــط

مش عايزة غيره أي بيت ؟!!

أنا عشت يا ابني سنين هنا ..

وأتمنى أموت برضك هنــــا

أفتح عينيه كل يوم ..

وأقفل عينيه كل يوم

علي فرشتي ومخدتي والبطانية واللحاف

علي أيد أبوك بتضمني ف صورة الزفاف

بتدفي قلبي وتحضنه ف سنيـــــــن عجاف

في الأوضه دي أنا لسّه عايشه ويّا أبوك عمري اللي فـــــات !!!

أصل الحبايب لوسابوك، بيعيشوا فيك بالذكريات ..

خليني يا ابني ويّا أبوك أصحي وابــات

واشم ريحته ف الحاجـــــــات

وأعيش معاه باقي الساعات

مين اللي قالك .. إنه مــــــــــــــــــات؟!

لسّّّه البدل جوّه الدولاب ..

جنب السرير أخر كتاب

نضارته أهي وعبايته أهي

ولسّّه سجادة الصلاة..

والسبحة فوقها منـــوّره ف سنين عجاف

ولسّّّه بااسمع ضحكته وسط السكـــــــات

أنا عايشه يا ابني.. بحاجة أبوك متونســــــــه

وبدخلتك ويّا العيال متونّسه

وأنا عارفه يا ابني،إن خدتني البيت الجديد

رايحه أتنســي .. وأنا يا ابني مش عاوزة أتنسي ؟!!

فإن كنت محتاج الوســع لأجل العيــــال؟

هات العيـــــــــــــال

أنا عندي يا ابني سرير كبير

حاارقد علي حرف السريــــر

وحاسيب لهم باقي السرير

وإن كنت محتاج السرير ؟؟؟.

خد السريــــــــــــر!!!

إن شالله أنام فوق الحصير

لكن أنام وسط الأمـان !!!

خليني يا ابني ف وسطهم ..

قدّرني (واحده) منهــــم

أصحي وأبات على حسهم باقي الزمان ..

وماهوش كتير ؟؟؟.. صدقني يا ابني ؟! ماهوش كتير

أنا مش حاأعيش أدّ اللي عيشته

ولا نفسي أعيش بعد اللي شفتــه

كمّّل جميلك .. واستر الباقي ف حياتي

أنا عمري يا ابني قصاد عينيك ..

فرّطت ف أمي أو حماتـي؟

إن كان ده مني ف يوم حصل

أنا كنت أقول باخد جزاتي

ما تقوللي إيه خلاني يا ابني أهون عليك

وساحبني ويا الهدمتين

رايح تسلمني بأيديك

فرطت ف امك؟.. قوللي ليه

أنا عمري يوم فرطت فيك

***

وإن كان علي ضيق المكان

ما أنا قلتلك خد السريـــر !!!

وإن كان علي ضيق المعيشة

أبوك سايبلي معاش كبيـــــــر

قسمته يا بني من زمان: النص ليك .. والربع مصروف العيـــــال

والباقي مصروف الـــــدوا !!

لكن خــلاص.. وحياة عينيك ما عاد حايلزمني الدوا

خد المعاش .. كل المعـــــــــــــاش !!!

لكن بــلاش أحس إن ربايتي فيك راحت بـــلاش

اللهم ارزقنا بر أبنائنا


--------------------------


إهـــــداء إلي روح :
الزعيـــم المصــــري الخالــــــد
( جمــــال عبـــــد الناصـــر )
:  في ذكري مرور 41 عام علي :
رحيله بالجسد
و بقاءه بالــروح
~~~~~~~~~~~~~~~~~~~
أقـــد م قصيـدة
:
( السقــــّـــا مـــــــــــات )
؟!!!
~~~~~~~~~~~~~~~

كان ياما كان أيام زمــــــان
أنا كنت أروح ف إدين أبويـا
شابكه إيدي في إيد أخويا
نـزور جنينــــــة الحيوانــات
نقف قصاد :
" البغبغــــــــــان "
و يقول  :
( أبوكـــوا السقــّـا مـــات )
!!!
~~~~~~
:
و لا كنّا نعرف
يبقي إيه  : " السقّا "  يابــا !!؟
و لا كنا نعرف حتي ايه معني  :
( الممــات )
؟؟؟
:
أنا كنت أضحك لمّا أقهقـــه !!
وامشي طول السكة أقولها :
للعيـــــــال وسط الحــــارات
يا عيــــــــــــال :
( أبوكــوا الســـا مـــــــات )
!!!
~~~~~~
:
و الطفولة كات زمان هيّ
البــــــــــــــــراءة
و ماكا نش فيها أي لمحه
م الجـــــــــــراءة
~~~~~~
:
أطفال زمان كانم غلابــــه
و ما يعرفوش الفرق يابـــا
بين الكـــــــلاب
ولآ
الديابــــــــــــــه
!!؟
~~~~~~~
:
و ماكانش لينا ف أي حلم يكون
بعيــــــــــــــــد
الحلــــــــــم دايما جوّه منّا كان
" وحيــــــــد"
:
ليّ كان :
فستان وصندل لونه أحمركان
بأبزيمـــــــــه حديد
:
أمّا أخويا :
بدله كامله وجزمه سودا و الشراب
و حــــــزام جــديد

كانوا ييجوا " مرّه واحده " ف كل :
( عيــــــــــــد )
؟؟؟
:
و ماكانش لينا :
في الأمل و الأمنيات ؟
غير إننا :
من عيد / لعيـــــــــــــد ؟
نـــروح :
" جنينة الحيوانات "  
نجررررري أوام ع البغبغان
و يقول :  
" أبوكوا السقــّـــا مــــات "
!!!
~~~~~~
:
راح الزمان وخد معاه كل :
الأمــــــــــــــــــــــــــــان
قتل البـــــــراءة
أحيا الجـــــــــــراءة
؟!!!
:
حتي / الكلاب المُخلصة  
قتلها يابــــــــا
أحيا الديابـــــــــــه
و الدنيا صبحت زي
غابـــــــــــــــــــــــه !!
و لاعادش في :
أطفــــــــــــــــــــــــال
" غلابـــه "
؟!!!
:
قصدي غلابه زيّنـــا ؟!
ما الغلب أصلـــــــــــه
ف شرعـنـا
ما كانش غلب بمعنى
فقـــــــــــر ؟!!!
ماكانش :
قهـــــــــــر ؟!!!
:
الغلب فينـــــــــــــــــــا كان
" طيابـــــــــــــه"
!!!
~~~~~~~
:
بنـّام كده بعد العشا
علي صـوت حواديت
( أمّنـــــــا )
تحكــي لنـــا
ع " الشاطر حسن " ؟
و نشوفه
( فــــارس حلمنـــــا )
؟!!!
:
و لاكانش في :
تليفزيونات و لا فيديوهات
و لا دشّيهــات
؟؟؟
قدرت تهّــــوب
يمّنــــــا
و تلخبط الصوّر الجميلــــة
اللي بترسمهـــا
( أمّنـــــــــا )
!!!؟
:
نصحي علي صوت
( الآذان )
من فــــوق سريرنا
يشدّنــــــــا
~~~
:
نجرررررروا نصلّـوا و نفطـروا
و نلّبسوا يابـــا
" المرايـــــــل "
و ما كانش فينـــــــــــــــا :
فــــــــــــــــرع
مايـــــل
ّّّّ!!!
~~~
:
نجروا بسرعه ع المدارس
( و بلدنـــــــــا )
كانـــت / بحـــر هـــادي
و احنـــــــا فيه / كنــــّـا
" النــــــوارس "
:
كل الشوارع كات أمـــــان
{ و المولـــــــي }
بس :
{ لوحده حـارس }
~~~~~~~~~~
:
والطفل كان / كتوت فصيح
ف البيضه كان عمّال
يكاكــــــي
!!!
و اللبــــــس فينــــــا كــان
" موحـّــــد "
و المرايــــــل / لونهـــــــــا
( كاكـــــــــــي )
؟!!!
~~~~~~~~~
:
و ما كانــــش / فـــي
و لا
( K G 1)
و لا
( K G 2 )
؟!!!
:
: و لا كانـــش / فينــــا
" طفل واحد "
: من
( هدومــــــه )
؟؟؟
سهل تعرف
مين
( أبــــــــــــوه )
!!!!
~~~~~
:
: ما احنـــــــا / كُنــــّــــا
( ولاد بلدنـــــــــــــــــا )
~~~~~~~~~~~~~
:
: كُنـــّـــــــا / جيـــــــــل
( ثــورة جمـــــــــــــال )
~~~~~~~~~~~~~~
اللي :
شــال / كـــل الملوك ؟!!!
:
اللي :
زال / الاحتــــــــــــلال ؟!!!
:
اللي :
طلّـــــع / الانجليـــــــز ؟!!!
:
اللي :
( أمّــــــم القنـــــــــــــال )
~~~~~~~~~~~~~~~
:
اللي خلّـــــي :
( الأرض / عـــــــــــــرض )
:
و احنــــــا فيهــا :
( أغلــــــــــــــــــي / ورد )
:
كنـّـا / حـب .. و كنـّــا / ودّ
:
كنـــّــــا
( مصـــــــــــــــــــــــــر )
~~~~~~~~~~~~~~
ف أحلـــــــي عصـــــــــر
كنـــّـــا :
معني / ما لهش
حصـــــــــــــــــــر
؟!!!
~~~~~
:
كنــــّـــا يابـــــا  :
( ولاد جمـــــــــــال )
~~~~~~~~~~~~
اللي :
علّمنـــــا / النضـــــال
~~~~~~~~~~~~
اللي :
علّمنـــــا / الصمــــود
:
كُنـــّـا " شعب " من :  
( الجنــــــــــود )
~~~~~~~~~
:
كنـــّـــــا
نـــــــــــــــــــــــــــــار
فوق كـــــــــل / عـــــود
؟!!!
~~~
:
و انتصرنـــــــــــــــا ف :
( بـــــــور سعيـــــد )
~~~~~~~~~~~~
ضــــــــــد / عـدوان
" الثلاثـــــــــي "
:
الصهاينه و الانجليز و الفرنساوي
الاساســـي
؟!!!
اللي جـه ياخـد / بتــــــاره
لمّـــــا :
(  أمّمنــــا القنـــــــال )
~~~~~~~~~~~~~
:
نصــــــــر كان فوق / الحقيقه ؟!!!
نصـــــــــر كــــــــان فـــــــــــوق
!!! الخيـــــــــــــال
~~~~~~~~~~
:
انتصرنــــــــا ودُقنــــــــا / طعــم
( الانتصـــــــــــــــــــار )
~~~~~~~~~~~~~
:
و ابتدي الليل .. اللي / عشّش ؟!..
يختفي ؟! .. بنــــــــــــور
النهـــــــــــــــــــــار
!!!
:
و ارتفعنــــــــــا ف العلالــــــــي
: و اتبنـــــي " الســـــدّ " اللي
( عالــــــــي )
؟؟؟
اللي قالــــــــــوا  / عليـــــــــــه
محــــــــــــال
؟!!!
:
(  اتبنـــي / بالإحتمــــال )
!!!
~~~~~~~~~~~~~~~
:
والنهـــارده ؟ .. لسّـه / خيــــــره
( صدقـــــة جاريـــــــــــة )
~~~~~~~~~~~~~~~
تـــــــروي :
( مصـــــــــــــــــــــر )
بــــــروح
( جمـــــــــــــــــــال )
~~~~~~~~~~~~
:
ميـّتـــــــــه :
تسقينــــــــــا / نشبـــــــــــــع
نــــروي بيهـــا الأرض / تـــــزرع
و اندفاعهـــا بيــدّي / طاقـــه ؟
شغّلــــت /  100 ألــــــــــــــف
( مصنــــــــع )
~~~~~~~~
:
نــــــوّرت :
( كــــذا ألف قريــــــــــه )
~~~~~~~~~~~~~~
لاجل تحكي :
( ذكـــــــــري غاليــــــــه )
ذكري تصرررررخ
فين :
( جمــــــــــــــــــــــــــــال)
؟!!!!
~~~~~~
:
و الاجابه ع السؤال :ـ
لمــّــا :  
( خانووووا ف يوم جمــــال )
؟!ّّ!!
:
إتكسرنـــــــــــا ف
( خمسه يونيو )
و دُقنا ذل / الانكســـــــار؟!!!
:
بـــّس :
(  أعظــــــــــم الرجـــــــال  )
~~~~~~~~~~~~~~~~
قال :-
سكوتنـــا ..
شئ محــــــــــــال ؟!!!
:
( حـــــرب الإستنــــــــــزاف )
~~~~~~~~~~~~~~~~~
طريقنــــــــــــا ..
و احنـــا / واخديـــــن
ع/ النضــــــــــال ؟!!!
:
(  و بعزيمــــــة الرجــــــــال  )
~~~~~~~~~~~~~~~~~
صحي من تاني
الآمـــــــــــــــــــال
!!!
ـــــــــــــــــــــــــــــــــــــــــــــــ
:
و امــّــا فجأة !!!
(مـــــات / جمــــــــــــــــــال )
ــــــــــــــــــــــــــــــــــــــــــــــ
:
اتكسر / فينـــــــــــــــا
التحـــــدّي والتصـــدّي
و الاحتمــــــــــــــــــال
؟!!!
~~~~
:
و امــّـا روحنــــا :
" للجنينـــــــــه "
؟؟؟
:
بغبغانهــــــا / الصاحــــي ؟ .. قال :
ياللي :
أبوكوا السقـــــّـــــــــا ماااااااااااااات
؟!!!!
:
!!! يومهـــــــا / فجـــــــــــــــــــــأه
( عرفت / معنـــــــي )
ـــــــــــــــــــــــــــــــــــــ
:
كان ف صغـــــــــــــــــــري
مالهش
معني
؟؟؟
:
يعنـي إيه  : ( السقا )  يابـــا ؟؟؟
يعني إيــــــــــــــــــــــــــــه  :
كلمـــة
( ممــــــات )
؟؟؟
:
كان  :  
جمـــــــــــــال
(( السقـــــــــــــــا  ))
لينــــــــــــــــا
؟؟؟
:
و النهارده
:
((( جمالنــــــــــــــــــــــــــا )))

ماااااااااااااااااات

؟!!!!

~.~.~.~.~

شاعرة الشعب
زينـات القليوبي



------------------


السلطانيّـــــة ؟!!!
*********
:
طول عمره :
عـاش : ف البلـــد
مطحون .. حزيـن
وفقيــــر ؟!
:
(( عامــل ))
دارعـــه .. سنــــد
والرجــل :
للمشاوير؟!
:
لا مرّه قلبه اتسعـد
ولا جتله .. بشرة :
خير ؟!
:
قضّي سنينـه :
شقا
يصحـــي مع :
الزقزقه
وينــــــام مـع :
العصافير !
:
ولمّا :
ضهــره اتحني
من قبل :
(( ستين سنة ))
سرح  :
الوجـــــــــــــع
مناشير ؟!
:
نقلـــــــوه علي :
( الإنعاش )
وحولوه :
(  لمعـاش )
والقلب وضعـه :
خطير ؟!
:
و قالوله :
ياعمنــا ..
(( حنكرمك ))
كلنــــــا ..
في  :
(( فنــــــدق ))
المشاهير ؟!
:
نســــي : الألم
والموت !
هتف : بعلـــــو
الصوت
(( خيركـــم ))
عليّ :
كتيــــــر !
:
قام غاســل :
( الأفـــارول )
ورفاه :
بعرض وطـول
وطـــار
بحلم كبيـــر ؟!
:
حيسلمـــــــوه :
( ألوفات )
يستّرولــــــــه :
بنات
:
والعبد :
ف التفكير ؟!
:
حيعينولــــــــه :
( الــــــواد )
وحاتكتر :
( الأعيـــاد )
:
والــرب
ف التدبير ؟!
:
نزل من :
( التوك توك )
وجسمــه :
( بيتكتــــــك )
خايف من :
التآخيــــر ؟!!!
:
ســــــأل علي :
العنوان
لقي نفسه جوّه
مكان
ولا قصر ..
ف الأساطير ؟!!!
:
دخل علي :
استحيـــا
ولا حاجه فيه :
صاحيه
وكأنه :
ف التخديـر ؟!!!
:
قابلوه :
بهليلــــــــه !!!
وكأنهم :
عيلــــــــــه !!!
مدير .. وجنبه :
وزيـــــر ؟!!!
:
إذاعات وفضائيات
مشاريب علي :
بوفيهات !!!
:
قلبه خلااااااااص
حايطير!!!
:
شرب يادوب
قهوه :
ونادوه علي :
سهوه :
(( شرفتنــــا ))
ياأمير ؟!
:
قدمت خداماتك
وفداتنـا بحياتك
فضلك : علينـا
كبيــــــــــر ؟!
:
بصراحه  :
فكرنــــــــــــا
وبسرعه :
قررنــــــــــــا
(( نـُرد ))
بعض :
الخير ؟!!!

نزلت :
دموع عينــه
حايسدوا ليه :
دينه ..
وحايدفع :
الفواتير ؟!!!
:
مسح دموعه
أوام ؟؟؟
فكر حايخــد
كام ؟؟؟
والله :
(( العيــال ))
حاتطيـر ؟!!!
:
حايقسم :
الأمـــــــــوال
علي :
(( العيـــال ))
ف الحال
من خوفه حد :
يغير ؟!!!
:
وفااااااااااااااق
علي :
( مُديره )
:
من عــــــــزّ :
تفكيره
:
بيقوله :
شوف : ياكبير
:
يافخر :
(( للعمـــال ))
ياأغلي :
م الأمــــــــوال
:
ياقائــــــد :
(( التعميــر ))
:
ياصنايعــــي :
( ياماهر )
يامصـــــري :
( يافاخر )
يامحتـــــــرم :
يا:
(( خبير ))
:
بلـــــــــــدك
بتفخــــــر
( بيك )
:
واحنا :
(( نَعمّنــــــــــــا ))
:
عليك
:
من بعد :
طــــــــــــــــــــــــول :
تفكير
:
:
:
((( بشهادة التقدير )))
؟!!!
***
:
شاعرة الشعب


-------------------



ماحدش فيكـــــــــوا :
يتآخــــــــــر
ويرمي :
( حمولهــــــــــا )
ع
التاني
؟!!!
بلدكــوا خلاااااااااااااص
بتتكسّّر
:
سنيـــــــــن قدامكـوا :
تتبعتــــر
بإيـــد : فاسد حقـــود
جانــــي
حكمّها وهوّه : شيـخ
منصــــــر
:
لبس توبـهـــــــــا
و عرّاها
نهب خيـــــــــرها
و شقّاها
:
و آخرتها :
ولا استكتـــــــــــر
؟؟؟
قتل :
( أولادهـــــــــــا )
بكّاهـا
وسابها يوماتي :
تتحسّر
؟!!!
:
ياأولادهــــــا :
( يامصرييـــــن )
:
تعالوا :
شيلوهــــــا :
( مُتحديــــــن )
:
ماحدش فيكـــــــــــــوا :
يتمنظر
؟!!!

مفيش :
مسلـــم و لا مسيحي
ولا سلفــي و اخوانـــي
ولا كنيسـة ولا أزهــــــر
 
ولا إئتلافات ولا أحــزاب
و ليبرالـــي و علمانــي
ولا أغنــي ولا أفقـــــــر

ولا مثقـــف ولا أمّــــي
ولا صعيدي وبحـــراوي
ولا أكبـــــــر و لا أصغـر

ولا يميني ولا يسـاري
ولا كنبــه .. ولا كفايـــه
ولا ابريـــــل
تعالوا زي :
(( طيـر آبابيــــل ))
:
تعالوا لأمكــم :
(((( ثـــــــــوار ))))
بيحموها :
عشــــــــــــــــــــــــان :
(((( أحــــــــرار ))))
:
بدون :
خلافات و لا حسابات
ولامنصـّـــات
ولا منظـــر
:
جميعاً :
(( كلكـــــــــم ))
يحضــــــر
:
تعالوا :
املوووووووا
(( ميادينهـــــا ))
:
وشيلوا :
الكســـــــرة من :
عينهـــــــــــا
:
عشان :
(( لمّتكــــــــوا ))
وحشاها
:
ومين عن :
(( أمــــــــــــه ))
يتآخـــــر
؟!!!
:
شاعرة الشعب

_________________
اعداد
محمد عبد القوى حسن

maa66aa66@hotmail.com
avatar
وكالة انباء الادب العربى
المدير العام للمنتدى
المدير العام للمنتدى

عدد المساهمات : 264
تاريخ التسجيل : 30/04/2010
الموقع : www.maa66.malware-site.www

http://www.maa66.malware-site.www

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى