وكالة أنباء الادب العربى
مرحبا بكم فى وكالة انباء الادب العربى

موسوعة شعراء العاميه المصريه / سيده فاروق الاسيوطى

استعرض الموضوع السابق استعرض الموضوع التالي اذهب الى الأسفل

موسوعة شعراء العاميه المصريه / سيده فاروق الاسيوطى

مُساهمة  وكالة انباء الادب العربى في السبت يناير 30, 2016 10:23 am

[url=]
سيده فاروق[/url]



لقمة عيش
يوماتى
استني
استني كتييييييير
واقف من مده قصاد الفرن يجيب لنا لقمة عيش متغمسة مر
وصبرك ياااااااه على صبرك
واقف قدام الفرن بتستنى كتيير
وأنا بستناك
ما تجيش
ارجع
اصبر نفسي
ينعل أبو خاش دى حكومة
لو فيه عدل كانوا الناس00000000
الناس إيه؟
غاب أبويا كتير على فرن العيش
يمكن0000؟
ويجوز 00؟؟
يجوز عدى يجيب تموين وخضار
أو يمكن راح كالعاده ميت مشوار
وبييجى تعبان وبينهج خالص
يقعد ع الكنبة
ساكت
خالص
بعد ما يعد ويحسب يجمع يطرح يضرب ف القرشين
وبقوة عظيمة يقضوا
العيش والأكل ويسيب حبة جنهات تحويش
يانهارى عليك
ازاى قادر ع الزمن البايخ ده
ازاى
أخر
أخر جامد
عدت ست شهور
ولا جاش
وكل ما بدخل
أشوف الكنبة بتاعته الفاضيه
استني وما يجيش
استني
وما يجيش
يخرب بيت أفران العيش
واسمع زينب أختي تحلف ورحمة أبويا
اصرخ فيها
واصرخ ف أمي لما تقول من ساعة ابوكى ما مات0000
اصرخ فيها
-فولى من ساعة ابوكى ما راح
أبكى
دلوقت
آن الوقت إن أبكى
أو يمكن؟
استناك
من تانى
ترجع
بالعيش
والملح
تموين البيت
الأمن000000000000




قصيدة (يا سيدى) شعر سيدة فاروق

دلوقتى

بس

مش حاسة بصداع

ولا حاسة بندالة الزمن

ولا بالادين

ساعة ما اتمدت لبدنى تمزعه

وتحظى بالقطفة السعيدة

بلا تمن

مش حاسه بصولت العيال

وصداع الشوارع

والخوف م اللى جاى

دلوقتى بس

هقدر

انام

من غير قلق

من غير اى خوف

من مشاكل

او مصايب

اوخسارات ف البشر

دلوقت بس

قدرت اسلم نفسى ليك

انت بس

امرك مطاع

فتحت جسمى  ميت كتاب

وانت جيت قريتنى جد

وبهمه ونشاط

اشتهتنى

وماكانش فيه وقت لضياعه

او فراغه

اوانتظار لحظة صفا

فتحت جسمى ميت كتاب

وقعدت تقرا

ف كل حرف ف كل نقطه بحس بيك

بحس بيك على جلدى العفن

لمسة حياة

وبرده حاضن جتتى من غير ملل

من غيركلل

يدووووبك قابلت حد

حب

وبحق وحقيق

قابلت حد

يقبل كل احزانى الغلاظ

ويقبل الخوف والتعب

ويقبل العقل اللى غاب

قابلتك انت

يامشتهايا

ومشتهاك

ارمح ف جسمى

كله لك

سقطت من جسمى العناد

والتشدد

والتجمد

والحاجات النص مص

كله اتمسح لما التقاك

الفين هنا وشفا عليك

كل بالهنا

تستاهل

الجسد اللى عمره ما اترمى لحظه ف حلال

ولا حرام

تستاهل الجسد الحلال

انت

الوحيد قرتنى صح

يا سيدى

الدوود العظيم








الواد قططى


الواد المترب ده
اايوه اللي مش باينه ملامحه ده هوه
ولا لون لقميصه الوحداني
الواد اللي لما بيهجم الجوع والحاجه لسيجارة فرط
يتكور تحت الحيط
الاخراانى هناااك ف القصر
ويتغطى بالحان الفرق الدايرة ف الأقاليم
يتدفى
ويغوط ف النوم
من غير كوابييييييييس  ولا شوق
الواد العاشق
كل حيطان القصر ده هوه
الواد اللي ساعات الناس بتخاف حتى تمد أديها حتى تسلم بس عليه
ويقولو عليه مجذوب ومكمكم
الواد العاشق
حافظ الحان الفرقة وكل كلام المسرح
وشتيمة المخرج لما يفيض الكيل
حافظ كل الكلمات ف النص
بالصوت والضوء والحركة
حافظ كل النغمات
ويشيل ف حاجاتهم
ونهاية الليل
لما بيتعب م اللف
ببدور على حد
يشحت منه سيجارة فرط
ولا يلاقى
يغمض عينه
ويدندن
ينكب النغم السارح فيه
ف آخر الليل
ف قلب مخازن لبس المسرح
يتغطى
بهدوم الفرقة الدايبه
ويغمض ف عنيه
فيناااااااااام بسعادة أمن
قططي
يقعد تحت الرجلين
وياشاش فضلات الفرقة وياكل
ويلم سبارس
وبنظرة   عجييبه عجيبه
تغرق جوه عنيه ولا بيكاسو
ولوركا لما بيتعب م التفكير ف قضايا العالم
ويشد ف عقب سيجارة ف ايده
بيبان كأنه يفكر ف الملكوت
والجسم تابوت
بيكتف جناحات أفكاره الضخمة الفخمة
ويغيييييييييب م الوعي
يقولو عليه مجذوب
يسحب ف الدخان  ويغمض عينه ببطء  شديد
ويروح حاطط رجل ما فوق التانيه
ويشد ف سيجارته الفرط
وآنا لما بعدى عليه بيقولى
آنا لو يوم مره ماجتش القصر؟
القصر يموت
ولا هتلاقى لاضوء ولاصوت
كل القصر ده هوه ما فوق كتافى
لو يوم غفلت  القصر يموت
أسيبه
واقعدمن بعد أراقبه
جنب الحيطة
آخر حيطة ف حيطان القصر
ينام ويغوط ف النوم
ويدندن طول ما هو نايم
قططي يا احنا بشكل جميل
من غير مكاييج ولا لون
آنا عايزة اعد  أدور عن كل حيطان القصر ف كل  سكك وحواري ودرب
قططية كتيييير ع العد
قططية لحن ماسمعوش حد

_________________
اعداد
محمد عبد القوى حسن

maa66aa66@hotmail.com
avatar
وكالة انباء الادب العربى
المدير العام للمنتدى
المدير العام للمنتدى

عدد المساهمات : 264
تاريخ التسجيل : 30/04/2010
الموقع : www.maa66.malware-site.www

http://www.maa66.malware-site.www

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى