وكالة أنباء الادب العربى
مرحبا بكم فى وكالة انباء الادب العربى

موسوعة شعراء العاميه المصريه /معاويه المهدى

استعرض الموضوع السابق استعرض الموضوع التالي اذهب الى الأسفل

موسوعة شعراء العاميه المصريه /معاويه المهدى

مُساهمة  وكالة انباء الادب العربى في الأحد يناير 31, 2016 8:17 pm

[url=]
معاويه المهدى[/url]


فضفضة
شعر : معاوية المهدي
إهداء : إلى أبي النبيل

*؛*؛*؛*

رغيف بتاو ..
و حتة جبنة تتدقدق
في حبة زيت
و بس يادوب طماطماية !!!
و ندعة شاي في كوباية
على الركية
و عين باكية تخاف الله
و كام مرجع ..
على الطبلية قدامه
قعد يقراه
و قلب كبييير
يساع كل البشر جواه
و سبحان الإله إداه
رضا و هيبه
لسان ذاكر
ما يعرف سكة العيبه
و زهد ف زينة الدنيا
و حلمه بسييييط

رغيف بتاو ..
و حتة جبنه تتدقدق
في حبة زيت
و بس يادوب طماطماية !!!
و ضلاية ..
في عز الصيف فريح توته
و كام حدوته
يحكيها مع عياله ..
يطوف بيهم
في بيت بالطين مدفيهم
و يحكي عن خوات فرسان
و أب نبيل فضل شقيان
و أم حنانها يتوزع
على المخاليق يكفيهم
و يحكي عن سنين صعبة
بكل حماس
و يوصف لحظة الإحرام
حدا الكعبة بصوت حساس
بسيط جدا ما بين الناس
و قلبه الماس ..
بيفتح للجميع بابه
و بص عليه مع قلمه
مع كتابه
مع مريديه و طلابه
تشوفه غويط
غويط جدا كأنه محيط
لكن برضه ..
تشوفه بسييييط
و كل مناه

رغيف بتاو ..
و حتة جبنه تتدقدق
في حبة زيت
و بس يادوب طماطمايه !!!
وكام آيه ..
يا عم الشيخ ..
بتقراها مع الأذكار ؟
فتبدأ بيها ترحالك
يبان حالك
و كلك يابه و بحالك
ملان أسرار
و أديني جاي بافضفض لك
ففضفض لي يديم فضلك
و قول لي إزاي ..
بحور العلم بتفيض لك
تزود لك معاني الحلم
و قول لي إزاي ..
بتنهي حروبك القاسية
بروح راسية ..
في ساحة سلم ؟
و قول لي إزاي ..
بتتوشوش ..
مع حب الندا و زرعه ؟
و قول لي إزاي ..
سقاك المولى من نوره ..
علوم شرعه ؟
و بتبسطها يابه إزاي ..
لمين يسأل كما الفتافيت ؟
و تفضل برضه كل مناك

رغيف بتاو ..
و حتة جبنة تتدقدق
في حبة زيت
و بس يادوب طماطماية !!!
حكايتك إيه يا عم الشيخ ؟
بترعش ليه حروف قلمي
و أنا باكتب لك الأشعار
يا بدر ف ليلي لما باتوه
و كف حنون على كتفي
يطبطب لما أكون منهار
أنا آسف يا عم الشيخ
مانيش قادر ..
أشد معاك جبل حملك
ماليش غير حرفي عكازي
ماليش غير فرشة ترسم لك
هالات النور يا أستاذي
يا عم الشيخ أنا آسف
لا ح تكفيك هالات النور
و لا توفيك من الأشعار
بحور و بحور
يا رامي الدنيا ورا ضهرك
و ساقي الكل من نهرك
و لا حوشت غير مهرك
لأحلى الحور
يا عم الشيخ ..
يا قايد في القلوب النور
إذا هليت
يا متمني من الدنيا
إذا اتمنيت
رغيف بتاو ..
و حتة جبنه تتدقدق
في حبة زيت
و حتى بدون ..
طماطمايه !!!




0000000000000000000000000000


ذكريات
شعر : معاوية المهدي

*؛*؛*؛*

و كنا زمان ..
بنصحى الصبح نتسحّب
و نفرك من عينينا النوم
و كله فـ إيده سنارته
و كام حتة عجين بالتوم
و كنا كمان
نجيب طعمية م السخنة
و حتة لفت ويّا العيش
عشان نفطر
و ياما زمان كمان دوخنا
عشان بنلاقي وسط الهيش
سمك أكتر
و كان القلب يتنطط
مع السفاريت و لمعتها
و ندعي يارب
و فيصل أخويا بيخطط
هناك في البيت لعلقتنا
في حفلة ضرب
و كنا زمان ما نزعلشي
و نركب تاني قطر الصيد
و لو علقتنا تذكرته
و نصحى الصبح نتسحب
و نفرك من عينينا النوم
واحشنا البحر و حجارته
و كنا عشان ما نتطمن
عشان الخطة تتأمن
بنصحى الصبح و نفنن
و نقنع فيصل العاقل
و بنظبط له سنارته
و كنا زمان
بنشعبط مع الأحلام
كانت أيااااام !!!


-----------------------------------

ترياق
شعر : معاوية المهدي

*؛*؛*؛*

الشعر .. مش حبة كلام
و لا تهتهه و لا نهنهه و لا شحتفه

ولا قافية بالعافية ونظام
ولا زيزفون و لا أفلاطون الفلسفه

الشعر ممكن .. لو جرام
وسط الكلام ينعد تل ، و يبقى حل

دا الشعر بير عتيق وخام
مليان سموم بتبوح بأسرار الشفا !!

_________________
اعداد
محمد عبد القوى حسن

maa66aa66@hotmail.com
avatar
وكالة انباء الادب العربى
المدير العام للمنتدى
المدير العام للمنتدى

عدد المساهمات : 264
تاريخ التسجيل : 30/04/2010
الموقع : www.maa66.malware-site.www

http://www.maa66.malware-site.www

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى