وكالة أنباء الادب العربى
مرحبا بكم فى وكالة انباء الادب العربى

موسوعة شعراء العاميه المصريه / ابو زيد بيومى

استعرض الموضوع السابق استعرض الموضوع التالي اذهب الى الأسفل

موسوعة شعراء العاميه المصريه / ابو زيد بيومى

مُساهمة  وكالة انباء الادب العربى في الإثنين فبراير 01, 2016 3:26 pm

[url=]
ابو زيد بيومى[/url]

أبو هَمّام ــــــــــــــــ شعر ــــــــــــــــ أبو زيد بيومي
ــــــــــــــــــــــــــــــــــــــــــــــــــــــــــــــــــــــــــــ
أبو هَمّام ... و بضَهره المَحنِي
زَيّ جريدة نخل قديمة
دايما كان في النصبة بتاعته
كام كباية ... على كام شيشة
أهو قرشين بيمَشُّوا العيشة
أهي مزقوقة
طول العمر يحُطّ الرُّقعة على الملزوقة
أهي مزقوقه
يوم ما تقولُّه ازّي الحال
بيبوس إيده ....
يقول مرزوقة
أبو همّام مش واخد حاجة
من على ضَهْر الأرض الواسعة غير مترين
دِكّة عجوزة و كُبّايتين
يعني مكانش معاه عربية آخر موضة
و بيركنها وسط الشارع
و لا بينافس جُوّة البورصة و لا بيصارع
و لا ويّاه أبراج و عماير
أو ملايين في السوق الداير
و لا ويّاه الشركة الحِبْلة
لجل يخلّف منها سيولة
أو كان داخل كام عملية
واخد منها نصيب و عمولة
و لا كان يعرف بيه أو باشا
و لا مسنود بـ ِ جِهَات مسئولة
و لا ويّاه مفاتيح عضوية
فاتح بيها بيبان مقفولة
و لا كان راكب يوم على كرسي
برطع بيه على ضَهْر بلاده
أو بنفوذه .. كام شُغلانة
قام راح زاقق فيها ولاده
و لا ليه عيّل داخل شرطة أو حربية
هوّ يا دوب حِتة جلابية
لامِم فيها بواقي الجِتّة
طول العمر ملصّم عيشته حِتّة بـ ْ حِتّة
عايش لكن بَرّة الهامش
ولا ليه حَدّ عليه بيدَوّر
إن كان عايش أو مش عايش
و لا ليه حَدّ يشوف عياله لو يوم جاعوا
لما بيِعيا يدُقّ الصبر ف لوح أوجاعه
هُمَّ يا دوب الكبايتين و الكام شيشة
حاجة بتِخْزِي عنين العيشة
كام ملطوش على كام ملطوشة
ولا يسووش الشيل والهَدّة
مش على باله بالمترين اللي متاويينه
إنه ف نظر حكومة بلده
ماشي مخالف وبيتعدّى
لكن لمّا اللودر عَدّى
طنّش كُل الدنيا بحالها
غمّض عينه ع اللي سرقها و اللي وَحَلْها
و اللي ف عزّ الروح ما بتطلع
قام يدبحها و راح حَلـّـَلـْها
خَد من لحم الحي ف حِجره
عدّى اللودر ...
ساب اللي على طول هابشينها
و طالعين يجروا
غمّض عينه ع اللي داس أملاكها و باني
والهربان من بعد ما كَلْها ... و عاوز تاني
واللي بتُهْرُش جلد مَصَالحه يَدّ الخاين
أو سمسار أراجوز في المشهد
واللي بيلعب فيه مش باين
واللي وكّل أهل بلاده لحم حميره
والقاعدين ف شاشات الدنيا
بيعَرُّوها و لا بيغِيروا
واللي اشتغلوا في المضروبة
والمشبوهة
والقاعدين على طول في الكرسي
و بعد ما خِربت راحوا سابوها
واللي مسَرْطِن قمحُه و عيشُه
واللي فوق قوانينها معدّي
و فارد ريشه
والدايسين دايما ضمايرهم
تحت الجزمة
والعايمين على موج الأزمة
واللي إيديهم جوة جيوبنا
طايلة و مادّة
لكن لما اللودر عدّى
طنّش كل الدنيا بحالها
كل قضايا بلدنا نسيها ... أو رَحّلْها
سابها و غطّى ع اللي عملها
قام راح ماسك ف ابو همام
إثبات حالة و كُلّه تمام
شال النصبة في دقيقتين
أهُو من يومها محدش عارف
أبو همّام اتبخر فجأة
و راح على فين .....
يمكن مرّة اللودر ينطق ويعرِّفنا ...
أبو همّام ....
من بعد ما صادروا جميع أملاكه
ودُّوه فين
-------------------





بدرني دقيق
فِ بساط عاشقين ع الشوك
مشيني حرير اللهفة عليه
اعتقني بحطّ عنيا إيدين
ف سلاسل شوفك
سرسبني عليّا خيوط للبكا تتكرّ
يِتْعَرّي تلج البعد .... يسيح
من حَرّ دخولي إليك


----------------------
فاكرة أول يمامة رفرفت
بين عيني وعينك
كان الخجل صياد
سيّل دما نظرتي على خدودك
طرحت ورود المد والجزر
فى بحر الرموش
بين اختيار الحط فى شط العيون
وبين مركبة
مِتْلوّنة بلون المدى
بتقول محاولة وصولك يا ولد
هاتروح ... سدى








قصيدتان


ـــــــ أبو زيد بيومي ــــــ باحب النظام


باحـب النضافة و امـوت في النظـام
وعــايش حــياتي غــرام في غــرام
عصامي مـا كلْتش فـ يـوم من حرام
و دا لأني دايما باحــــب النظــام


باروح شغلي بدري و بامضي انصـراف
ولا جيت ف مـــرّة عمـــلت انحـــــراف
تشوفني سكوتي مليش في الكلام
باحـــبه باحبــــه باحــــــب النظــــام


أَهَــندِم هــُـدومي ..... أداري الرُّقَـع
و باكتم همـومي و باعمـــل جَــدَع
عشــــان دنيا زايلة باعيشها بسلام
باحـــبه باحبــــه باحــــــب النظــــام


و لا احـب أشـبع و لا اكــو ن تخـين
و باكـلها طـقّة و اجــوع طــقتـين
و لو مــرّة ضاقـــت أشـــــدّ الحـزام
باحـــبه باحبــــه باحــــــب النظــــام


و بامـشـي ف حــالي ماكـلمش حد
و دا لأني دوغــري و مظـبوط و جد
ولا امشي ف مظاهرة و لا ف اعتصام
باحـــبه باحبــــه باحــــــب النظــــام




حمــار شـــغل صــابر و لا قلت آي
و لو حـدّ يِنْـــدَه أقــول أيْوَا جــــاي
و اشـــيل اللي يركب وكُلّي احترام
باحـــبه باحبــــه باحـــــب النظــــام


باحب اللي فـوقي يكون ديكتاتور
ويرضي غروري يقــــوللي يــا تـــور
و انفّــذ بســــرعة و أدّي التمـــام
باحـــبه باحبــــه باحــــــب النظــــام


ماعنديش كـلام للي فـوق غير نعم
و منطــــــوقشـي لأّّّّّة واكــون محترم
و بــاخـــد حــوافـــزي تمــام التمـام
باحـــبه باحبــــه باحــــــب النظــــام


ولا احـــــب أبدا أشـــوف غـير لتحت
لا بصّيت عــلالي و لا جـيت و رُحْـت
ما هاينوبني غـير التــعب والمــــلام
باحـــبه باحبــــه باحــــــب النظــــام

باحــــــب العـــــدالة مــا دام ملتــــزم
و اطالـب بحـقّي ف ضـرب الجــــزم
و اطاطي لنصيبي و اعــدّلّه كـــــام
باحـــبه باحبــــه باحــــــب النظــــام


بــأدّي الفــــرايـض و انــا مســـتـحي
و لا اعــملشي سُــني و لا مُـلتــحي
و احــــافظ على مبدأ الأمـــن عـــــام
باحـــبه باحبــــه باحــــــب النظــــام


و لا اعـــمـل شــــيوعي واروح لليــسار
باكـــبّر دمــاغي و لـو تبــــقى نـــار
مليش دعــوة غير باحترام النـــظام
باحـــبه باحبــــه باحــــــب النظــــام


مفيش مـــرة خــالـص دخلت النيـابـة
خروفي مســالم ف وســــط الديابـة
و لو ديب ياكـــلني أقـــــولـّه قــــوام
باحـــبه باحبــــه باحــــــب النظــــام


أزق فْ مراكـــبي يمـــكن تســـير
و لا اقرا جرايد ولا احلـــم كتــــير
و اشـــّد فْ غطـايا و بـدري أنـام
باحـــبه باحبــــه باحــــــب النظــــام


مليش عمري دعوة بكلام السياسـة
كلام المعارضــة دا كـفر ونجاسـة
تقوللي كفاية أقولــّك حـــــــرام
باحـــبه باحبــــه باحــــــب النظــــام
باحـــبه باحبــــه باحــــــب النظــــام


ــــــ 11/ 5 /2005

















ـــــــ أبو زيد بيومي ــــــ بو عزيزة
بو عزيزة
كان مجرد شخص عادي
ناس كتير زيّه فْ بلادي
في الحواري بِتْلاقيهم ... والبيوت
هُم ََّ ملح الأرض .... طِينْها
أمّا قُوْتْهم .. نُصُّه كلمة من نَبِي
والبقية من كلامهم
يلحسوها بالسكوت
الوشوش فيها سماحة
والملامح كلها
طِيبة ومَلاَحة
لو تشوفها بِتْلاقيها
البشوشة الليِّنة
شخص عادي .....
ساكن الضل فْ ضلوعه
من عِنِيْه بتشوف إيمانه
للإله .... بتشوف خضوعه
يصحى بدري
تطلع الشمس لْطُلوعه
أُمْنِيَاتُه فْ يومه يِلْقى لُقمتين
يِسْتلفهم مِنُّه جوعه
أُمْنِيَاتُه هَيِّنة
شمس يومه هِيَّ أمُّه
جلاَّبيِّة نورها فِ ايده
شدَّها و يروح وَرَاها
من ضُحاها .... للغروب
كان يقينه
إنّ إيد رَبّه كريمة محسنة
و ف ْ صلاته بيدعي ربّه
يهدي فيهم اللي حاكم واللي ساد
و انُّهم يِتْزحزحوا
يفْتَحوا سِكّة يعدّي
سلسبيل قوت العباد
والموازين .... في إِيدِيْهم
ريقْها يِتْبَلّ بْعدالة
يرتوِي بالحق عودْها
تستوِي نُضْرِة خدودها في المعاد
لكن الحاكم بأمره
راح بنى من عقله معبد للعناد
ترتفع أسوار قساوتة
يعتقل فيها البلاد
عَسْكَرُهْ في كل حِتَّة
" أكثروا فيها الفساد "
زرعة السُّحت فْ بطونهم
فَرْعها مال عَ الضماير
طَلْعَها في الدمّ داير
و القلوب ترضع غشاوة
ع العيون تِنْزل ستاير من رماد
دقة القلب فْ صدورهم
حاطّة رجليها ف بيادة
والجبين طافح بلاَدَة
غِلّهم في النفْس عادة
يشتعل .... يصبح حريق
لو يعدّي النور فِ سِكّة
يقطعوا فـْ وِشُّه الطريق
العَمَى أجَّر عِنِيهم
والعقود من مِيْت سَنَة
بو عزيزة .... إنْ شرب مَيّة وعودهم يخذلوه
إن طلع سِلّم خياله .... نزّلوه
يجلدوا نظرة عيونه
لو تبصبص يوم لِبُكرة
تِتْورب أبواب طموحه
يقفلوها بألف أُكْرة
يزرعولُه شوك بِيِكْره
لما تطرح في الإيدين السوسنة

بو عزيزة ..... بالغريزة
حَسّ إنه مش هنا
و ان ّ أرضه المؤمنة بِتِنْكِره
و الخطاوي فاس بتهدم
أيّ جسر بْيِعْبُره
و انّ روحه لا هِي طايلة
تِتْربط حبل فـْ وريده
أو تلاقي فـْ جسمه حِتّة
تبقى قبر و تحفره
يبقى مَيِّت مِنُّه فيه
لو يموت فينا الوطن ....
راح تموت فـِ عْنِينا كل الأَمْكنة
كل حاجة مُوهِنة ....
لما صاري عمره يمسك في الشراع
والإرداة فْ بحره تبلع
كل جِتَّة للضياع
والصراع اللي فْ كيانه
يهدَى بركانه ..... يروق
لما مركب دمّه تمشي في العروق
ترتفع موجة همومه
تلقى ضهره انحنى
كلّ حاجة موهنة
للجبين اللي انزرع عبّاد شموس
صار بساط مفرود لآخرُه
تحت رجلين الطغاة
المدمنة دايما تدوس
بو عزيزة راح عرف
إنّه عاشق خائنة
سلّمت مفتاح وريده
للعسس والعسكري
من عميل ..... لمُفترِي
ده بِيلِْحَس لقمته من ولاؤه للجِزَم
دَهْ بيُربُط في الحِزَم
من حصاد الألسنة
والأمل كالقرد ملّ النطنطة
من فوق شجر ....
لا فروع ولا ورق
والحياة كام رطل منها إتْسرق
قشّة في لحظة غرق مش ممكنة
ألف موت دايس زناد
من هناك .... تلقاه هنا
السعادة و الهَنَا
إنه يفضل فيك نَفَس ؟
لو بيخرج ... ما بياخدش الروح معاه
لو بيدخل .... يِنْسى يِدّيك الحياة ؟
والمصير ....تصبح أداة للسلطنة فـ إْيدين طغاة
و العروش أوتاد بتغرز نابها في لحم الوطن
سِمّها يفتل عروقك حبل يشنق خطوتك
إيه هَيِفْضَل غير بَدَن
يِتقَفِل ع الروح تابوت
إيه هيفْضَل غير توّلع جتّتك
إيه هيفضل غير تموت
إيه هيفضل ...
غير تموت

ــــــــ 4 / 10 / 2011



أبو زيد بيومي
ــــــــــــــــــــــــــــــــــــــــــــــــــــــــــــــــــــــــــــــــــــــ
أبو زيد بيومي أحمد أبو زيد

من مواليد مدينة طما بسوهاج 4/7/1974

ـ عضو اتحاد كتاب مصر .

ـ عضو الامانة العامة لمؤتمر أدباء مصر 2012 / 2013 .

ـ رئيس نادي أدب طما 1998 /1999 .

ـ رئيس تحرير مجلة المروج الأدبية من 1998 وحتى عام 2000 .

ـ عضو هيئة تحرير مجلة الرسالة الجامعية 1997 ــ 1998 .

ـ عضو جمعية الثقافة من أجل التنمية .

ــــــــــــــــــــــــــــــــــــــــــــــــــــــــــــــــــــــــــــــــــــــ

ــ دكتوراه 2009 ( كلية الآداب جامعة المنيا ) .
ــ ماجستير 2002 ( كلية الآداب ـ جامعة حلوان )
ــ ليسانس الآداب 1997 ( كلية الآداب ـ جامعة جنوب الوادي )

ــــــــــــــــــــــــــــــــــــــــــــــــــــــــــــــــــــــــــــــــــــــ
ــ مشاركات :
ـ المشاركة في مؤتمر أدباء مصر ( شرم الشيخ 2012 )
ـ المشاركة في مؤتمر أدباء مصر ( القاهرة 2011 ) .
ـ المشاركة في مؤتمر أدباء مصر ( الغردقة 2007 ) .
ـ المشاركة في مؤتمر أدباء مصر ( سوهاج 20006 ) .
ـ ممن كُتِب عنهم في ( معجم أدباء مصر ) الصادر عن وزارة الثقافة ـ 2006 .
ـ المشاركة في المهرجان الشعري الذي نظمته الهيئة العامة للاستعلامات التابعة لوزارة الإعلام ( أقيم بمركز إعلام طهطا 2002 ) .
ـ المشاركة في مؤتمر أدباء مصر ( الإسكندرية 2002 ) .
ــ المشاركة في مؤتمر أدباء مصر ( مطروح 2000 ) .
ـ المشاركة في المؤتمر الأدبي لإقليم وسط وجنوب الصعيد الثقافي 2000 .
ـ المشاركة في فعاليات وندوات معرض القاهرة الدولي للكتاب منذ عام 1998 .
ـ المشاركة في العديد من اللقاءات التليفزيونية والإذاعية .
ــــــــــــــــــــــــــــــــــــــــــــــــــــــــــــــــــــــــــــــــــــــ
أعمال منشورة :
كتب خاصة :

ــ التوظيف الفني للشعر في القصة العربية القديمة ( دراسة ) دار العلم و الإيمان 2008 .
ــ ( العفاريت ) ـ شعر ـ دار العلم و الإيمان 2008 .
ـــ ( التوازن في عملية إبداع النص الشعري ) دراسة ( دار العلم والإيمان ) ـ 2009 .
ـــ ( شوية طوب من حلم امبارح ) شعر ( دار الأدهم ) ـ 2015 .
ـــ ( درويش في مولد وطن ) شعر ( دار ميريت ) 2016 .
ــ كتب مشتركة مع آخرين :

ـ ( عبد الحميد إبراهيم في عيون الأدباء و المفكرين ) الهيئة العامة لقصور الثقافة ــ 2007 .

ـ ( رقصات على إيقاع الجنوب ) وزارة الثقافة ـ 2006 .

ـ ( عبد الحميد إبراهيم واسطة المنظومة النقدية 2001 ) الهيئة العامة لقصور الثقافة .

ـ ( أغنيات جديدة لوجه الشعر ) الهيئة العامة لقصور الثقافة 2000 .

ـ نصوص عشرينية ( جامعة جنوب الوادي ـ فرع سوهاج ــ 1998 ) .

ـ أعمال أدبية منشورة ودراسات بالصحف والمجلات المصرية : أخبار الأدب ــ الثقافة الجديدة ـــ المساء ــ الحوار ـــ أقلام ــ الموجز ـ الشعر ـ الدستور ـ العربي .
ــــــــــــــــــــــــــــــــــــــــــــــــــــــــــــــــــــــــــــــــــــــ
جوائز :
ــ تكريم محافظة سوهاج ومديرية التربية والتعليم ( احتفالية الفائقين 2007).
ــ الثاني في مسابقة الإذاعة المصرية ( إذاعة جنوب الصعيد ) 1999 .
ــ ثالث الجمهورية في مسابقة المجلس الأعلى للثقافة 1999 .
ــ ثالث إقليم وسط وجنوب الصعيد الثقافي 1998 .
ــ تكريم الإذاعة المصرية ( إذاعة جنوب الصعيد ) 1998 .
ــ أول الجمهورية في مسابقة الثقافة الجماهيرية ( الهيئة العامة لقصور الثقافة 1997 ) .







_________________
اعداد
محمد عبد القوى حسن

maa66aa66@hotmail.com
avatar
وكالة انباء الادب العربى
المدير العام للمنتدى
المدير العام للمنتدى

عدد المساهمات : 264
تاريخ التسجيل : 30/04/2010
الموقع : www.maa66.malware-site.www

http://www.maa66.malware-site.www

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى