وكالة أنباء الادب العربى
مرحبا بكم فى وكالة انباء الادب العربى

موسوعة شعراء العاميه المصريه / عزت ابراهيم

استعرض الموضوع السابق استعرض الموضوع التالي اذهب الى الأسفل

موسوعة شعراء العاميه المصريه / عزت ابراهيم

مُساهمة  وكالة انباء الادب العربى في الثلاثاء فبراير 02, 2016 8:22 pm


[url=][/url]



بعد الفاصل
شعر / عـزت إبراهيم
• مواطن .
قرر أخيراً ..
إنه يسد الشباك ..
ويصلَّح خشبه المكسور .
قرر ..
يقفل خرم الباب الوحيد ..
في البيت الوحيد ..
في العالم الوحيد .
قرر أخيراً ..
يرفع سبت البقال ..
والعيش .. والفول ..
يكسر قرص التليفون ..


ويولع كل الأنوار ..
قرر..
يلغي حواسه الخمسة ..
ويفتح مواسير الغاز وينام .
قرر أخيراً ..
ي
ع
ي
ش ……


• وطــن .
رافع ديل جلابيته ..
ومالي الحجر بشر ..
ورفوف ..
وكراسي وعربيات .
بيمد إديه ..
يسحب في حاجات .. يرميها بعيد ..
وحاجات .. يرفعها لفوق ..
وحاجات يدفنها .
غبي .
بيديق حجره ساعات ،
ولحد الخنق ..
وساعات تلقاه فضفاض ،
فـتـّوه ..
مجنون .
بيحب الزيف ..
عمره ما بيفرق بين اللي بيديله بارود ..
واللي بيديله رغيف .
جواه بردان ..
بـراه بردان ..
الفرق ما بينك وما بينه ..
إن انت وهو السجنا ..
وهو السجان .
اصرخ ..
هتموت .
اسكت ..
هتموت .
هيمد إديه ..
يسحب من لغتك كل حروفها ..
ومن شنطة سفرك ، ألبومك ..
وأجندة يومياتك ..
ويبوسك من تحت عنيك ..
ويقول لك :
. Welcome my sane

[url=][/url]


بليـاتـشــو

شعر / عزت إبراهيم


فعلاً عرض هايل
البلياتشو البارع
عرف ازاي يتنطط ويخلي الجمهور
يهتف له كتير
أكثر من 25 سنة
والبلياتشو البارع
قادر يخدع جمهوره بجد
عارف إمتى النطة تكون بالطول
وإمتى تكون بالعرض
وأخيراً
يقلع يوني فورمه
ويلبس بدلة
يحط الشنطة على كتافه
ويعمل عرض جديد
يقعد على قهوة في أي ميدان
أو شارع أو شق
يقعد يتكلم يتكلم
لما الناس في القهوة تصدق
وأخيراً
وف آخر الليل
يركب آخر مترو
ويروح ع البيت
يقلع وشه
ويلبس هلاهيله
وف أي مكان في الأوضة
يمدد وينام
يصبح
يمسح مكياجه
ويحط قناع البلياتشو
ويروح ع العرض
مع إن النص تراجيدي
قدر البطل البارع
يقنع بعض الجمهور
بنكاته البايخة
ويخرج عن النص
حول أبطال العرض لمادة هزل
لما العرض فلت من إيده
وماعرفش يكمل للآخر
قلع الدور
وعمل دور دجال
حاول يقنع جمهوره اللي ابتدا يتسرسب
إنه خبير في فنون السحر
وخبير في جميع الأحوال
وشئوون الخلق
فكر إنه يرص الجمهور الباقي معاه
واحد في الصف الوسطاني
واتنين في الصف اللي وراه
وتلاتة في آخر صف
وبخبرة كل الشياطين
حاول يبعد عن أفكار الناس
إن الصف الأول فارغ
واما انقلب العرض
وبان النص مشوه
تاه
مابقاش قادر يفضل فوق المسرح
ولا قادر يلحق كرسي
في أي مكان
أو صف
واما المخرج حاول يصرخ
مــــــــــات


[url=][/url]


كيــوبيــد (1)
شعر/ عزت إبراهيم
بتكلم نفسك؟
مش قادر تفهم إنك واحد
واقف بيدور على نُص جديد
على عمر جديد
على شمس تفك لسانك
وتحرك حتة ضوء جواك !!
متأخر حلمك جداً
من أمتى الشمس بتدخل سراديب؟
ماتلومش النور
كتفت أديك
وعصبت مشاعرك
ورضيت
كنت بتتفرج على فعل حروفك
في قلوب المجانين بالشمس
كان الكيوبيد
يجمع قصاقيصك لاصحابك
ويطير:
حرفين للزهرة على الفستان
حرفين للوردة اللي في قلب كتاب الأحياء
حرفين للتوكة اللي في شعر الفراشات
حرفين للقلب
لكن حرفيتك
كنت مأجلهم دايماً للبحر
والموجة اللي انت أخيراً
قررت تفك كنوزك قدامها
ماهيش قابلاك
ضغطت على الضلع المكسور جواك
كشفت للشيخ اللي حاولت كتير تنساه
السر..
قدرت بسهولة تقول لك فوق
مانتاش العارف بفنون الغطس
وبكل هدوء حطت جثمانك على أقرب شط
ولأنك روح
خطيت هلاهيلك وحروفك وبقايا ضلوعك
ومشيت
*****
كيــوبيــد (2)
تاني ؟!!
لساك بتحاول حل اللغز؟!!
لساك محتار؟
طيب شوف ..
كيوبيد اللي انت بتستنى سهامه .. هناك ..
نايم وسط الأطفال النايمين في الطل
الصبح بيغسل عربيات مجانين الليل
وف آخر الليل
تلقاه وسط التايهين في الشارع
أو تحت الكوبري
أو جوه سلالم عمارات السوبر ناس
أو بيغافل كلب جعان
وبيسرق منه عشاه
هـــا
لساك بتدور على الحب؟
دور ...
بس ما تنساش
بم إنك واحد من مجانين الزمن الجاي
اسأل جلادك عن عدد الجلدات
عدد الصعقات الكهربائية
ما انت كإنسان ..
عفواً
أنت كجثمان
من حقك تعرف كل حقوقك
اسأل
كام مرة الموج هيلطَّش فيك؟
كام مرة هيضحك بحرك؟
أو يرميك
كام مرة هتحلم ؟
أو حد ها يحلم بيك
وما تلاقي جواب
هتنام
وهاتلقى حبيبتك بترفرف حواليك
بس ان خانك قلبك
وصحيت
ماتلومش عنيك
يا هترجع تقعد تحت الكوبري مع الكيوبيد
تغسل عربيات مجانين الليل
يا هاتسرق من الكلب عشاه
أو ينهش فيك
ها
لساك محتار
خليك


[url=][/url]



سيرة ذاتية وأدبية
• الاســــــم: عزت محمد إبراهيم
• اللقب: عزت إبراهيم
• تاريخ الميلاد: 23 ديسمبر 1964
• الصفــــــة: شاعر وكاتب مسرحي
• الوظيفة الحالية: عضو مجلس تحرير مجلة: "الثقافة الجديدة"
• المــــولـــد والنشأة: قرية الزنكلون – مركز الزقازيق – محافظة الشرقية – مصر.
• العضويات: عضو اتحاد كتاب مصر
• أصـــــــدر: أربع دواوين شعرية ومجموعة قصصية وديوانان للأطفال ومسرحية:
1. "بنحب موت الحياة" شعر - سلسلة إبداعات (الهيئة العامة لقصور الثقافة)1999م
2. "حاجات مفقودة كتير" شعر - سلسلة الجوائز (الهيئة العامة لقصور الثقافة)2000م
3. "مشهد قديم" شعر - سلسلة رؤى شرقية (الهيئة العامة لقصور الثقافة)2002م
4. "الروح اللي طلعت النهارده" شعر - سلسلة إشراقات جديدة (الهيـئـــة العــامـــة للكتــاب)2004م
5. "كوخ صغير وشجرة كبيرة" قصص أطفال - سلسلة قطر الندى (الهيئة العامة لقصور الثقافة)2006م
6. "الحلبة الخضراء" مسرحية - سلسلة نصوص مسرحية (الهيئة العامة لقصور الثقافة)2009م
7. "إيد واحدة" شعر طفل - سلسلة كتاب قطر الندى (الهيئة العامة لقصور الثقافة) 2011م
8. "حكايات في محبة مصر" - المركز القومي لثقافة الطفل (المجلس الأعلى للثقافة) 2015م
• لــه تحـت الطبع :
• "كيوبيد" - ديوان شعر عامية
• "كلام الأفراح في الريف الشرقاوي" - جمع ميداني من المأثور الشفاهي المصري
• "كافيه الطيبين" - مسرحية للأطفال
• الجوائــز :
• جائزة المسابقة الأدبية المركزية بالهيئة العامة لقصور الثقافة في شعر العامية عن ديوان (حاجات مفقودة كتير) عام 1999م .
• جائزة مجلة النصر في أدب الطفل (قصة) عام 2003م عن قصة (جزيرة القمح).
• جوائز أخرى إقليمية في شعر العامية والمسرح.
• الوظائف التي شغلها :
• عمل سكرتير تحرير سلسلة "إبداعات" بالهيئة العامة لقصور الثقافة. 2002
• عمل مدير تحرير سلسلة "الأعمال الكاملة" بالهيئة العامة لقصور الثقافة. 2006
• عمل مدير تحرير سلسلة "فنون بلدنا" بالهيئة العامة لقصور الثقافة. 2008
• عمل مدير تحرير سلسلة "إصدارات خاصة" بالهيئة العامة لقصور الثقافة. 2011
• عضو مجلس تحرير مجلة الثقافة الجديدة 2015 وحتى الآن.
• كتابات وأنشطة اخرى:
• كتب بعض الأبحاث في الفولكلور والتراث السينمائي منها:
• (الوشم تراث تشكيلي شعبي) – موسوعة الفنون التشكيلية – 2008
• (باب الحديد فتح السكة لسينما المهمشين) "مجلة أبيض واسود" مصر، العدد (2) مايو - 2008م.
• (السينما بين عوربة الشكل وأمركة المضمون) "مجلة أبيض واسود" مصر، العدد (3) أغسطس - 2008م.
• (أيام كأنها حياة "مشاهدات استطلاعية في شمال سيناء") في إطار مشروع (وصف مصر الآن) 2007م.
• كتب عدد من الأغنيات لفرقة المصريين من ألحان الموسيقار "هاني شنوده" وغناء المطربة "منى عزيز" والفرقة.
• كتب أغنيات لمسرحيات الطفل منها (خاتم الملك) – (الكتاب الغضبان) تأليف وأشعار (حادي بادي) ثقافة جماهيرية (هاني شقاوة) للقطاع الخاص .
• الإنجازات:
• شارك في إعداد وتنفيذ كثير من الفعاليات الثقافية بالهيئة العامة لقصور الثقافة منها (مؤتمر أدباء مصر) – (محكى القلعة) - (واحة الشعراء – مقهى نجيب محفوظ - بليالي المحروسة الرمضانية) - (معرض القاهرة الدولي للكتاب) بالإضافة لكثير من البرامج الثقافية والأمسيات الشعرية في أقاليم مصر المختلفة .
• نشر كثير من الأعمال الشعرية والمتابعات لبعض الأنشطة الثقافية والمؤتمرات في المجلات الثقافية والصحف المصرية منها: أخبار الأدب – صباح الخير – الجمهورية – الثقافة الجديدة – الأخبار – الشعر – الإذاعة والتلفزيون – الكواكب – أبيض واسود – الجريدة - القاهرة.

• كتب عنه:
• تناول أعماله الشعرية والمسرحية وآداب الطفل كثير من النقاد والأدباء في المؤتمرات والمنتديات والتجمعات الأدبية والثقافية وكذا في المجلات والجرائد المتخصصة منهم: أ.د. أحمد يوسف علي، د.محمود نسيم، جمال بخيت، عبد العزيز موافي، مسعود شومان، د. محمد زيدان، د. محمد عبد الحليم غنيم، صابر فرج، عبده الزراع، العربي عبد الوهاب، عطية معبد، عاطف عبد المجيد، سمير الأمير، سمير الفيل، د. زينب العسال، صلاح والي.
• تحدث عنه في التلفزيون والإذاعة المصرية: د. مدحت الجيار، محمد السيد عيد، عبد العزيز موافي، فؤاد قنديل، محمود الحلواني.
• له بعض المدونات والمشاركات على شبكة المعلومات الدولية (الإنترنت).
• يشارك ببعض أعماله الإبداعية في موقع (كتب عربية) لنشر الإصدارات الإبداعية والثقافية وتصفحها على شبكة المعلومات الدولية.
Ezat112@gmail.com
التوقيع
عزت إبراهيم


_________________
اعداد
محمد عبد القوى حسن

maa66aa66@hotmail.com
avatar
وكالة انباء الادب العربى
المدير العام للمنتدى
المدير العام للمنتدى

عدد المساهمات : 264
تاريخ التسجيل : 30/04/2010
الموقع : www.maa66.malware-site.www

http://www.maa66.malware-site.www

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى